Vətən şəhidlərini heç vaxt unutmayacaq!

20 Yanvar Azərbaycan xalqının hüzn və şərəf günüdür. Xalqımız bu faciədə həyatdan getmiş övladlarına matəm saxlamaqla bərabər, onların şəhidlik zirvəsinə baxaraq başını dik tutmalıdır. Çünki Vətən və torpaq şəhidləri ilə ucalır

1990-cı il yanvarın 19-dan 20-nə keçən gecə Azərbaycanın o vaxtkı rəhbərliyinin istəyi və SSRİ rəhbərliyinin əmri ilə Azərbaycanda kommunist rejimini saxlamaq və milli azadlıq hərəkatını boğmaq məqsədilə Bakıya böyük bir ordu (rəsmi rəqəm 35 mini göstərir) yeridilmişdi. SSRİ Müdafiə Nazirliyi, DİN və DTK-nın hazırlayıb həyata keçirdiyi "Udar" adlı əməliyyatda əsas rolu xüsusi təyinatlı "ALFA" və SSRİ DTK-sının "A" təxribat qrupları oynayırdı. Sovet qoşunlarının təcavüzü nəticəsində Bakıda 134 mülki vətəndaş öldürülmüş, 600-dən çox adam yaralanmışdı. Öldürülənlər arasında beş millətin nümayəndələri, 20-dən çox qadın, uşaq var idi. "Qara Yanvar"ın indiyədək özündə saxladığı sirlər çoxdur. 100 cildlik istintaq materialının 69 cildi Bakıdan Moskvaya, keçmiş SSRİ Prokurorluğuna aparılıb və bir daha geri qaytarılmayıb.

"Qanlı Yanvar"ın 20ci ildönümü tamam olur. 1990-cı ilin 20 Yanvarından ötən illəri ilk növbədə ümumxalq kədəri, hüzn kimi qeyd etmişik, şəhidlərimizin ruhunu sızıntı ilə anmışıq. Amma bir şeyi unutmamalıyıq ki, 20 Yanvar Azərbaycan xalqının tarixində, sadəcə, ağı və acı ilə xatırlanacaq gün deyil. 20 Yanvar Azərbaycan xalqının şan və şərəf günüdür. Unutmamalıyıq ki, həmin gün küçələri boyamış şəhid qanları bir anlamda milli məfkurəmizin oyanan günəşinin qırmızı şəfəqini simvolizə edirdi. Xalqımız həmin gün üstünə şığıyan dəhşətli kabusa, sovet hərbiyyəsinin qorxunc qaragüruhuna qarşı sinəsini verməyi və deməli, özünün mənliyini və mətinliyini nümayiş etdirməyi bacardı.

Məhz həmin hadisələr bilavasitə nümayiş etdirdi ki, Azərbaycan xalqı özgürlük mübarizəsinə qalxmaq, pozulmuş hüquqlarının, suverenliyinin bərpa olunması uğrunda savaşmaq əzminə sahibdir. 1990-cı ilin 20 Yanvarı Azərbaycanın iqtiqlaliyyət yolunun ilk şəhidlik zirvəsi idi.

* * *

Bununla belə, Ə.Qafarov hesab edir ki, 1990-cı il yanvarın 19-dan 20-ə keçən gecə tankların altında əzilən şəhidlər Azərbaycan tarixinin qızıl səhifələrini yazıblar. Xalqımızın qan bahasına əldə etdiyi müstəqillik, üçrəngli dövlət bayrağımız, himnimiz də şəhidlərdən bizə yadigar qalıb. Onun sözlərinə görə, Azərbaycan artıq dünya dövlətləri sırasında suveren, tamhüquqlu bir ölkədir: "İndi ən vacib məsələ torpaqlarımızın işğaldan azad edilməsidir. Şəhidlərimizin yolunu davam etdirmək mənim üçün böyük şərəfdir".

Həmsöhbətimin 20 Yanvar şəhidlərinin övladlarına da deyiləsi sözü var: "Şəhidlərin övladlarına söyləyərdim ki, onlar tək deyillər, onların dərdi bizim hamımızın dərdidir. Əslində azadlıq yolunda, vətən uğrunda canını fəda edən şəhidlər ölmür. Əksinə, onlar öz ölümləri ilə ölümsüzlük qazanır, şəhidlik adına yüksəlir. Bundan böyük hünər, bundan yüksək ucalıq ola bilməz"